This title is printed to order. This book may have been self-published. If so, we cannot guarantee the quality of the content. In the main most books will have gone through the editing process however some may not. We therefore suggest that you be aware of this before ordering this book. If in doubt check either the author or publisher’s details as we are unable to accept any returns unless they are faulty. Please contact us if you have any questions.
RIBA KAYA
Kore kore! …Abo bai pabou…, ami ta pasa di patras. Mientras e prome figura ta kore duru bai perde den un hanchi skur e ta grita: Na unda nos ta topa?
Chin e kontesta ta bin di e direkshon kontrali. Esei ta e ultimo palabranan prome ku tur dos figura skur, disparse den anochi. Zonido pisa di pia, i un rosea hansha ta trata na persigui nan. Kachonan ta blaf sin miserikordia. Skuridat ta skonde e dos suhetonan. Niun hende no ta mira nan mas. Nubia ta tapa e tiki luna ku tin. Hansha, soda i rabia un homber ta keda para na kuminsamentu di e kaya smal, skur i sushi kaminda el a mira e ultimo suheto disparse aden. Drenta of no? Korda e malechor ta skonde tras di kualke bari of muraya ku un palu kla pa batie!? Ku duele e ta pensa riba su potmoni ku 200 florin aden. Ken a mand'e bin den e bario. skur aki? E ta disidi di bel polis ounke ku e sa ku nan lo no por hasi nada. E no a mira ken a atrak'e i e lo no por duna un deskripshon. Solamente e sa ku nan tabata dos. Net ora e bira pa bai su outo bek e ta mira ku su rabu di wowo su potmoni benta kantu di kaya. E ta bula riba dje. Manera el a pensa, e potmoni no tin e sen aden. Su sen a disparse. Alivia e ta konstata ku su reibeweis, papelnan i sedula si t'ei ainda… Hopi leu for di dje e dos amigunan atrakado ta topa otro. Nan ta sinta riba stupi di un restorant chines den nan mes bario. Kuantu sen nos a gana? Esun delega, kolo kora ta puntra e otro. Lagami konta… Esun mas skur ta bisa. Nos tin 200 florin.
Laga nos kita for di dje prome ku nan yega. Duna mi 100 florin pa mi warda. Esun kolo skur ta tuma e papel di 100 florin, dobl'e chiki chiki i hink'e den su boka, na su banda di kara. Di e forma aki e ta sigura e sen pa niun hende no hort'e. No ta e prome bia ku nan ta perde nan botin. Nan a bira sabi. Ban…ban…ata nan ta bin. E malechor delega ta bisa hansha. No, mi ke kome, mi no a kome awe ainda. E otro ta bisa. Pero nos ta perde tur e sen si nan hana nos! Ban! Ku urgensia esun delega ta ranka su amigu na su man. Kontra di su boluntat su amigu ta komplase. Nan ta kore drenta mondi, sali na e otro banda i buska un otro chines pa nan kumpra un kuminda. Despues di kome diferente pia di galina ku batata den sous i bebe un serbes nan ta len kontra di un palu. Ha, barika yen ta un bon kos. Ni un minut nan no ta pensa riba dono di e sen ku nan a horta.
